തിരുവനന്തപുരം: സംസ്ഥാനത്തെ രൂക്ഷമായ വിലക്കയറ്റം ചർച്ച ചെയ്യണമെന്ന് ആവശ്യപ്പെട്ട് പ്രതിപക്ഷം നൽകിയ അടിയന്തര പ്രമേയ നോട്ടീസാണ് നിയമസഭയിൽ ഇന്ന് ചർച്ച ചെയ്യുന്നത്. എം.എൽ.എ. പി.സി. വിഷ്ണുനാഥാണ് നോട്ടീസ് നൽകിയത്. ഉച്ചയ്ക്ക് 12 മുതൽ രണ്ട് മണിക്കൂറാണ് ചർച്ചയ്ക്കായി സമയം അനുവദിച്ചിട്ടുള്ളത്.
സഭാസമ്മേളനത്തിന്റെ ആദ്യ ദിവസത്തെ അടിയന്തര പ്രമേയം പോലീസ് അതിക്രമങ്ങളെക്കുറിച്ചായിരുന്നു. ഇന്നലെ ചർച്ച ചെയ്തത് അമീബിക് മസ്തിഷ്ക ജ്വരം വർധിക്കുന്ന സാഹചര്യമാണ്. ഈ വിഷയത്തിൽ പ്രതിപക്ഷം സർക്കാരിനെതിരെ രൂക്ഷമായ വിമർശനങ്ങൾ ഉന്നയിച്ചപ്പോൾ, ആരോഗ്യ മന്ത്രി വീണാ ജോർജ് മറുപടി നൽകി.
അമീബിക് മസ്തിഷ്ക ജ്വരം അപൂർവ രോഗമാണെന്നും, എല്ലാ ജലാശയങ്ങളിലും അമീബ സാന്നിധ്യമുണ്ടാകാമെന്നും മന്ത്രി പറഞ്ഞു. രോഗം കണ്ടെത്തിയവർക്ക് കൃത്യസമയത്ത് ചികിത്സ നൽകാൻ കഴിഞ്ഞതായും, രോഗം സ്ഥിരീകരിച്ചയുടൻ തന്നെ പ്രതിരോധ പ്രവർത്തനങ്ങൾ നടത്തിയതായും മന്ത്രി വിശദീകരിച്ചു. 2024-ൽ ഈ രോഗം ചികിത്സിക്കുന്നതിനുള്ള മാർഗ്ഗരേഖകൾ തയ്യാറാക്കിയതും മന്ത്രി ചൂണ്ടിക്കാട്ടി.
കൂടാതെ, ആരോഗ്യ മേഖലയിൽ കേരളം അമേരിക്കയേക്കാൾ മുന്നിലാണെന്ന് മന്ത്രി അവകാശപ്പെട്ടു. ഇത് കേരളത്തിന് അഭിമാനകരമായ നേട്ടമാണെന്നും, എന്നാൽ പ്രതിപക്ഷം ഇതിനെ അപമാനമായി കാണുന്നുവെന്നും വീണാ ജോർജ് വിമർശിച്ചു.
