ഇസ്രായേൽ ഉപരോധത്തിൽ നട്ടംതിരിയുന്ന ഗാസയിലേക്ക് ഈജിപ്ഷ്യൻ ജനത ഒരുങ്ങുന്നത് കടലിലൂടെയുള്ള ഭക്ഷ്യധാന്യ വിതരണത്തിന്. ‘കടലിൽ നിന്ന് കടലിലേക്ക് – ഗാസയ്ക്കായി പ്രതീക്ഷയുടെ ഒരു കുപ്പി’ എന്ന പേരിൽ ആരംഭിച്ച ഈ ക്യാമ്പയിൻ, കൊടിയ പട്ടിണിയിൽ വലയുന്ന ഗാസൻ ജനതയ്ക്ക് ആശ്വാസമേകാനുള്ള അസാധാരണമായ ശ്രമമാണ്. മെഡിറ്ററേനിയൻ കടലിലൂടെ കുപ്പികളിൽ ഒഴുകിയെത്തുന്ന ഈ ഭക്ഷ്യവസ്തുക്കൾ ഒരു പ്രതിഷേധവും പ്രതീക്ഷയുമാണ്. മരുന്നും ഭക്ഷണവും ലഭിക്കാതെ കുട്ടികൾ ഉൾപ്പെടെ 113 പേർ മരിച്ച ഗാസയുടെ നിലവിലെ അവസ്ഥയും ഈജിപ്തിൻ്റെ ഈ മാതൃകാപരമായ ഇടപെടലും ലോകശ്രദ്ധ ആകർഷിക്കുന്നു.
