ഉത്തർപ്രദേശിലെ ലാലാ ലജ്പത് റായ് മെമ്മോറിയൽ മെഡിക്കൽ കോളേജ് ആശുപത്രിയിൽ ചികിത്സാ നിഷേധത്തെ തുടർന്ന് രോഗി മരിച്ചതായി ആരോപണം. വാഹനാപകടത്തിൽ പരിക്കേറ്റ സുനിൽ എന്നയാൾക്ക് ചികിത്സ വൈകിയതാണ് മരണകാരണമെന്ന് കുടുംബം പറയുന്നു. ഡ്യൂട്ടിയിലുണ്ടായിരുന്ന രണ്ട് ജൂനിയർ ഡോക്ടർമാർ രോഗി വേദനകൊണ്ട് പുളഞ്ഞ് കിടക്കുമ്പോൾ ഉറങ്ങുകയായിരുന്നുവെന്നാണ് ബന്ധുക്കളുടെ പ്രധാന ആരോപണം. സംഭവത്തിൻ്റെ ഞെട്ടിക്കുന്ന ദൃശ്യങ്ങൾ സാമൂഹിക മാധ്യമങ്ങളിൽ വ്യാപകമായി പ്രചരിച്ചതിനെ തുടർന്ന് രണ്ട് ഡോക്ടർമാരെ സസ്പെൻഡ് ചെയ്യുകയും വിശദമായ അന്വേഷണത്തിന് ഉത്തരവിടുകയും ചെയ്തിട്ടുണ്ട്. പൊതുജനാരോഗ്യ സംവിധാനത്തിലെ ഗുരുതരമായ വീഴ്ചയിലേക്കാണ് ഈ സംഭവം വിരൽ ചൂണ്ടുന്നത്.
