മുസ്ലിം പുരുഷൻ രണ്ടാമത് വിവാഹം രജിസ്റ്റർ ചെയ്യുന്നതിന് മുൻപ് ആദ്യ ഭാര്യയുടെ ഭാഗം കേൾക്കണമെന്ന് കേരള ഹൈക്കോടതിയുടെ സുപ്രധാന വിധി. ജസ്റ്റിസ് പി.വി. കുഞ്ഞികൃഷ്ണൻ്റെ സിംഗിൾ ബെഞ്ചാണ് ‘കേരളാ വിവാഹങ്ങൾ രജിസ്റ്റർ ചെയ്യൽ ചട്ടങ്ങൾ, 2008’ പ്രകാരം നടക്കുന്ന രജിസ്‌ട്രേഷനുകൾക്ക് വ്യക്തിനിയമത്തേക്കാൾ ഭരണഘടനാപരമായ മൗലികാവകാശങ്ങൾക്കാണ് പ്രാധാന്യം നൽകേണ്ടതെന്ന് വ്യക്തമാക്കിയത്. ആദ്യ ഭാര്യ എതിർപ്പ് അറിയിച്ചാൽ രജിസ്ട്രാർ വിവാഹം രജിസ്റ്റർ ചെയ്യരുത്. ഈ വിധി മുസ്ലിം സ്ത്രീകൾക്ക് ലിംഗസമത്വവും നീതിയും ഉറപ്പാക്കുന്നതിൽ നിർണ്ണായകമായ ഒരു നിയമപരമായ പരിഷ്കരണത്തിന് വഴിയൊരുക്കുന്നു.
