സിപിഎം കണ്ണൂർ ജില്ലാ സെക്രട്ടറിയേറ്റ് യോഗത്തിൽ മുഖ്യമന്ത്രി പിണറായി വിജയന്റെ പ്രവർത്തന ശൈലിക്കെതിരെ കടുത്ത വിമർശനമാണ് ഉയർന്നുവന്നിരിക്കുന്നത്. മുഖ്യമന്ത്രിയുടെ നിലവിലെ ശൈലി ജനങ്ങൾക്ക് ദഹിക്കുന്നില്ലെന്നും പാർട്ടി ജനങ്ങളിൽ നിന്ന് അകലാൻ ഇത് കാരണമാകുന്നുണ്ടെന്നും യോഗത്തിൽ വിലയിരുത്തലുണ്ടായി. നേതൃത്വം സ്വയം തിരുത്താൻ തയ്യാറായില്ലെങ്കിൽ അണികൾ ചേർന്ന് നേതൃത്വത്തെ തിരുത്തിക്കുന്ന അവസ്ഥയുണ്ടാകുമെന്ന കടുത്ത മുന്നറിയിപ്പാണ് യോഗത്തിൽ ഉയർന്നത്. ലോക്സഭാ തിരഞ്ഞെടുപ്പിലെ കനത്ത തിരിച്ചടിയുടെ പശ്ചാത്തലത്തിൽ പാർട്ടി കോട്ടയായ കണ്ണൂരിൽ നിന്നുതന്നെ ഇത്തരം ഒരു വിമർശനം ഉയർന്നത് വലിയ രാഷ്ട്രീയ ചർച്ചകൾക്ക് വഴിതുറന്നിരിക്കുകയാണ്. വരും ദിവസങ്ങളിൽ സംസ്ഥാന സമിതിയിലും ഈ വിഷയങ്ങളിൽ വലിയ വാദപ്രതിവാദങ്ങൾ ഉണ്ടാകുമെന്നാണ് രാഷ്ട്രീയ നിരീക്ഷകർ വിലയിരുത്തുന്നത്.
