ചെന്നൈ : ചെന്നൈയിൽ യുവതിയെ ലൈംഗികമായി പീഡിപ്പിച്ച കേസിൽ ബൈക്ക് ടാക്സി ഡ്രൈവറെ പോലീസ് അറസ്റ്റ് ചെയ്തു. 22 വയസ്സുള്ള യുവതിയെ ഉപദ്രവിച്ച ശിവകുമാർ എന്നയാളാണ് പോലീസിന്റെ പിടിയിലായത്. പ്രതിയെ ചൊവ്വാഴ്ച കോടതിയിൽ ഹാജരാക്കി ജുഡീഷ്യൽ കസ്റ്റഡിയിൽ വിട്ടു.
ഇയാളുടെ മോട്ടോർ സൈക്കിളും പോലീസ് പിടിച്ചെടുത്തു. ചെന്നൈയിലെ പക്കികരണൈയിലുള്ള സുഹൃത്തിനെ കാണുന്നതിനായി തിങ്കളാഴ്ച വൈകിട്ടാണ് യുവതി ബൈക്ക് ടാക്സി ബുക്ക് ചെയ്തത്. തിരിച്ചുള്ള യാത്രയ്ക്കായി കാത്തിരിക്കാൻ യുവതി ശിവകുമാറിനോട് ആവശ്യപ്പെട്ടിരുന്നു.
യുവതിയെ വീട്ടിൽ കൊണ്ടുവിടുന്നതിനിടെ വിജനമായ വഴിയിലൂടെ സഞ്ചരിച്ച ശിവകുമാർ ഭീഷണിപ്പെടുത്തി ലൈംഗികമായി പീഡിപ്പിക്കുകയായിരുന്നു. പീഡനത്തിന് ശേഷം ഡ്രൈവർ യുവതിയെ വീട്ടിൽ ഇറക്കിവിട്ടു. വീട്ടിലെത്തിയ യുവതി ഭർത്താവിനോട് സംഭവം തുറന്നു പറഞ്ഞു. സ്ത്രീയുടെ പരാതിയുടെ അടിസ്ഥാനത്തിൽ നടത്തിയ അന്വേഷണത്തിനൊടുവിൽ പൊലീസ് പ്രതിയെ അറസ്റ്റ് ചെയ്തു.
