കൊച്ചി : പീഡാനുഭവങ്ങൾക്കും കുരിശുമരണത്തിനും ശേഷം യേശുദേവൻ മരണത്തെ കീഴടക്കി ഉയിർത്തെഴുന്നേറ്റതിന്റെ ഓർമ്മ പുതുക്കി ലോകമെമ്പാടുമുള്ള ക്രൈസ്തവർ ഇന്ന് ഈസ്റ്റർ ആഘോഷിക്കുന്നു. അമ്പതു ദിവസത്തെ വലിയ നോമ്പിന്റെയും പ്രാർഥനാനിർഭരമായ കാത്തിരിപ്പിന്റെയും പുണ്യവുമായാണ് വിശ്വാസികൾ ഉയിർപ്പ് തിരുനാളിലേക്ക് കടന്നുവന്നത്.
സംസ്ഥാനത്തെ വിവിധ ദേവാലയങ്ങളിൽ അർദ്ധരാത്രി മുതൽ പ്രത്യേക പ്രാർഥനകളും ശുശ്രൂഷകളും നടന്നു. കാക്കനാട് മൗണ്ട് സെന്റ് തോമസിൽ നടന്ന തിരുക്കർമ്മങ്ങൾക്ക് മേജർ ആർച്ച് ബിഷപ്പ് മാർ റാഫേൽ തട്ടിൽ നേതൃത്വം നൽകി. മാർപാപ്പയായി ചുമതലയേറ്റ ശേഷമുള്ള ആദ്യ ഈസ്റ്റർ സന്ദേശത്തിൽ ലിയോ പതിനാലാമൻ മാർപാപ്പ മാനവികതയ്ക്കും സമാധാനത്തിനും ഊന്നൽ നൽകി. വിശ്വാസികൾ ഒത്തുചേരലുകളിലൂടെയും സ്നേഹവിരുന്നുകളിലൂടെയും ഈസ്റ്റർ ആഘോഷത്തെ അർത്ഥവത്താക്കി.
കഷ്ടപ്പാടുകൾക്ക് ഒടുവിൽ വിജയത്തിന്റെ ഒരു പുലരി ഉണ്ടാകുമെന്ന് ഈസ്റ്റർ ഓർമ്മിപ്പിക്കുന്നു. സ്നേഹവും സമാധാനവും ലോകമെങ്ങും പടർത്താൻ ഈ ദിനം ആഹ്വാനം ചെയ്യുന്നു. അധികാര ഗർവിനെ താഴെയിറക്കി എളിമയെയും സാഹോദര്യത്തെയും ഉയർത്തിപ്പിടിക്കുന്നതാണ് ഉയിർപ്പിന്റെ സന്ദേശം.
