പാലക്കാട് : വിവാഹ വീട്ടില്‍ വോട്ട് ചോദിച്ചെത്തിയ പി സരിന്റെ ഹസ്തദാനം നിരസിച്ച്‌ രാഹുല്‍ മാങ്കൂട്ടത്തിലും ഷാഫിയും.ഉപതെരഞ്ഞെടുപ്പ് പ്രചാരണം ആവേശത്തോടെ തുടരുന്നതിനിടെയാണ് കല്യാണ വീട്ടില്‍ വോട്ട് ചോദിച്ചെത്തിയ പാലക്കാട്ടെ എല്‍ഡിഎഫ് സ്ഥാനാർത്ഥി പി സരിനും കോണ്‍ഗ്രസ് സ്ഥാനാർത്ഥി രാഹുല്‍ മാങ്കൂട്ടത്തിലും പരസ്പരം കാണുന്നത്.
രാഹുലിനും കൂടെയുണ്ടായിരുന്ന ഷാഫിക്കും ഹസ്തദാനം നല്‍കാൻ സരിൻ കൈനീട്ടിയിട്ടും ഇരുവരും കാണാത്ത പോലെ നടന്ന് നീങ്ങി. പല തവണ രാഹുലിനെയും ഷാഫിയെയും സരിൻ വിളിച്ചെങ്കിലും തിരിഞ്ഞുനോക്കാതെ ഇരുവരും നടന്ന് നീങ്ങുകയായിരുന്നു.
രാഹുല്‍ മാങ്കൂട്ടത്തില്‍ സരിൻ്റെ സാന്നിധ്യത്തില്‍ കോണ്‍ഗ്രസ് വിമത നേതാവ് എ വി ഗോപിനാഥിനെ ചേർത്തുപിടിച്ചു. എന്നാൽ എല്ലാം ജനങ്ങള്‍ കാണുന്നുണ്ടെന്ന് സരിൻ മാധ്യമങ്ങളോട് പ്രതികരിക്കുകയും ചെയ്തു.
തനിക്ക് കപടമുഖമില്ലായെന്നും പി സരിന് കൈകൊടുക്കാൻ പ്രയാസമുണ്ടെന്നും രാഹുല്‍ മാങ്കൂട്ടത്തില്‍ അറിയിച്ചു. ചെയ്യുന്നതെല്ലാം ആത്മാർത്ഥമായിട്ടാണ്. ചാനലുകളുടെ മുൻപിൽ അഭ്യാസം കാണിക്കാൻ പ്രയാസമുണ്ടെന്നും രാഹുല്‍ മാങ്കൂട്ടത്തില്‍ കൂട്ടിച്ചേർത്തു.
