തിരുവനന്തപുരം : കുടുംബവഴക്കിനെത്തുടർന്ന് ഭാര്യ താമസിക്കുന്ന വീടിനും വാഹനങ്ങൾക്കും തീയിട്ട ഭർത്താവ് അറസ്റ്റിൽ. തിരുവല്ലം സ്വദേശി ശങ്കറാണ് അറസ്റ്റിലായത്. കുറച്ച് നാളുകളായി ഭർത്താവിൽ നിന്ന് അകന്ന് കഴിയുന്ന ശരണ്യ പുഞ്ചക്കരി പേരകത്ത് വാടകയ്ക്കാണ് താമസം.
ഇന്നലെ രാത്രി ശങ്കർ വീടിനും വാഹനങ്ങൾക്കും തീയിടുമെന്ന് ഭീഷണിപ്പെടുത്തിയതിനെത്തുടർന്ന് ശരണ്യ തിരുവല്ലം പോലീസിൽ പരാതി നൽകിയിരുന്നു. പോലീസ് വീട്ടിലെത്തിയപ്പോഴേക്കും ശങ്കർ രണ്ട് കാറുകൾക്ക് തീയിട്ടിരുന്നു. സമീപത്തുണ്ടായിരുന്ന സ്കൂട്ടറിലേക്കും വീടിന്റെ ഉള്ളിലേക്കും പടർന്ന തീ പോലീസും ഫയർഫോഴ്‌സും ചേർന്നാണ് അണച്ചത്. ഏകദേശം പത്ത് ലക്ഷം രൂപയുടെ നഷ്ടം കണക്കാക്കുന്നുണ്ട്.
