കണ്ണൂർ : കമ്പിൽ ടൗണിലെ എഐ ക്യാമറയുടെ കണ്ണ് വെട്ടിച്ച് നിയമലംഘനം നടത്തുന്ന ബൈക്ക് യാത്രികരുടെ സാഹസിക യാത്ര മറ്റ് യാത്രക്കാർക്കും കാൽനടക്കാർക്കും വലിയ ഭീഷണിയാകുന്നു. ക്യാമറയിൽ ദൃശ്യം പതിയാതിരിക്കാൻ വേണ്ടിയുള്ള ഇവരുടെ വഴിമാറിയുള്ള അമിതവേഗത അപകടങ്ങൾ ക്ഷണിച്ചുവരുത്തുകയാണ്.
കമ്പിലിൽ നിന്ന് കണ്ണൂർ ഭാഗത്തേക്ക് പോകുന്ന വഴിയിൽ റോഡിന്റെ വലതുഭാഗത്താണ് വർഷങ്ങൾക്കു മുമ്പ് എഐ ക്യാമറ സ്ഥാപിച്ചത്. സാധാരണയായി കണ്ണൂർ ഭാഗത്തുനിന്നും മയ്യിൽ ഭാഗത്തേക്ക് പോകുന്ന വാഹനങ്ങൾ ഇടതുഭാഗത്തൂടെ പോകേണ്ടതിന് പകരം ക്യാമറയിൽ പതിയാതിരിക്കാൻ വലതുഭാഗത്തൂടെയാണ് അമിതവേഗതയിൽ കടന്നുപോകുന്നത്.
നിയമലംഘനം മറികടക്കാൻ വേണ്ടി ബൈക്കുകൾ ക്യാമറ ഒഴിവാക്കി ഓടിക്കുന്ന ഈ രീതി കാൽനട യാത്രക്കാർക്ക് വലിയ വെല്ലുവിളിയാണ് ഉയർത്തുന്നത്. കഴിഞ്ഞ ദിവസം ഇത്തരത്തിലുണ്ടായ സംഭവത്തെ തുടർന്ന് ബൈക്ക് ഇടിച്ച് യാത്രക്കാരിക്ക് പരിക്കേറ്റിട്ടുണ്ട്.
നിയമലംഘനങ്ങൾ മറികടക്കാൻ ക്യാമറ കാണാതെ ബൈക്ക് മാറി പോകുന്ന അവസ്ഥയിലാണ് അപകടങ്ങൾ ഉണ്ടാകുന്നത്. നിരവധി തവണ ഇവിടെ അപകടം നടന്നതായി കമ്പിൽ ടൗണിലെ ഓട്ടോഡ്രൈവർമാർ പറയുന്നു. പ്രശ്നം അധികൃതരെ അറിയിച്ചെങ്കിലും നടപടികൾ ഉണ്ടായിട്ടില്ലെന്ന് ഓട്ടോ ഡ്രൈവർമാർ പറയുന്നു.
