മൂവാറ്റുപുഴ: കൂത്താട്ടുകുളം എംസി റോഡില്‍ മീങ്കുന്നത്ത് നിയന്ത്രണം നഷ്ടപ്പെട്ട കാര്‍ കെഎസ്ആര്‍ടിസി ബസിലിടിച്ച് അപകടം. ബുധനാഴ്ച രാവിലെ 11.30 ഓടെ മീങ്കുന്നം പള്ളിക്ക് സമീപമുണ്ടായ അപകടത്തില്‍ കാര്‍ യാത്രികരായ ദമ്പതികള്‍ക്ക് പരിക്കേറ്റു. പാലക്കുഴ തടത്തില്‍പുത്തന്‍പുര മത്തായി (60), ലിസി മത്തായി എന്നിവര്‍ക്കാണ് പരിക്കേറ്റത്.
മൂവാറ്റുപുഴ ഭാഗത്ത് നിന്നും കൂത്താട്ടുകുളം ഭാഗത്തേക്ക് പോവുകയായിരുന്ന കാര്‍ നിയന്ത്രണം നഷ്ടപ്പെട്ട് എതിര്‍ദിശയില്‍ വരികയായിരുന്ന കെഎസ്ആര്‍ടിസി സ്വിഫ്റ്റ് ബസിലേക്ക് ഇടിച്ച് കയറുകയായിരുന്നു. അപകടത്തില്‍ പരിക്കേറ്റവരെ മൂവാറ്റുപുഴയിലെ സ്വകാര്യ ആശുപത്രിയില്‍ പ്രവേശിപ്പിച്ചു. കെഎസ്ആര്‍ടിസി ബസിലുണ്ടായിരുന്ന 42ഓളം യാത്രികര്‍ പരിക്കുകളേല്‍ക്കാതെ രക്ഷപെട്ടു.
അപകടത്തെ തുടര്‍ന്ന് മൂവാറ്റുപുഴ കൂത്താട്ടുകുളം എംസി റോഡില്‍ ഗതാഗതം ഭാഗികമായി തടസ്സപ്പെട്ടിരുന്നു. തുടര്‍ന്ന് മൂവാറ്റുപുഴ ഫയര്‍ഫോഴ്‌സും, പോലീസും, നാട്ടുകാരും തേര്‍ന്ന് വാഹനം റോഡില്‍ നിന്ന് നീക്കിയാണ് ഗതാഗതം പൂര്‍വ സ്ഥതിയിലാക്കിയത്. വാഹന്തില്‍ നിന്നും റോഡിലേക്ക് പതിച്ച ഓയിലും ഫയര്‍ഫോഴ്‌സ് അധികൃതര്‍ നീക്കം ചെയ്തു. ഇടിയുടെ ആഘാതത്തില്‍ കാര്‍ പൂര്‍ണ്ണമായും തകര്‍ന്നിട്ടുണ്ട്.
