ന്യൂഡല്‍ഹി : ഇന്ത്യയുടെ സുരക്ഷക്ക് ഭീഷണി നൽകുന്ന നടപടികള്‍ മാലദ്വീപിന്റെ ഭാഗത്ത് നിന്ന് ഉണ്ടാവില്ലെന്ന് പ്രസിഡന്റ് മുഹമ്മദ് മുയിസു. നാല് ദിവസത്തെ സന്ദർശനത്തിനായി അദ്ദേഹം ഇന്ത്യയിലെത്തിയപ്പോഴാണ് അദ്ദേഹത്തിന്റെ പ്രതികരണം.
ഇന്ത്യയുടെ സുരക്ഷയെ തകിടം മറിക്കുന്നതൊന്നും മാലദ്വീപിന്റെ ഭാഗത്ത് നിന്നും ഉണ്ടാവില്ലെന്ന് അദ്ദേഹം പറഞ്ഞു. മാലദ്വീപിന്റെ പകരം വയ്ക്കാനാകാത്ത പങ്കാളിയും സുഹൃത്തുമാണ് ഇന്ത്യ. പരസ്പര ബഹുമാനത്തിന്റെയും പങ്കാളിത്ത താല്‍പര്യങ്ങളുടെയും പശ്ചാത്തലത്തിലാണ് ഇരുരാജ്യങ്ങളും തമ്മിലുള്ള ബന്ധമെന്നും അദ്ദേഹം കൂട്ടിച്ചേർത്തു.
മറ്റ് രാജ്യങ്ങളുമായുള്ള സഹകരണം മേഖലയുടെ സുരക്ഷയിലും സ്ഥിരതയിലും വിട്ടുവീഴ്ച ചെയ്യുന്നില്ലെന്ന് ഉറപ്പുവരുത്തിക്കൊണ്ട് പ്രാദേശിക സുരക്ഷയ്ക്കും സ്ഥിരതയ്ക്കുമുള്ള തന്റെ രാജ്യത്തിന്റെ പ്രതിബദ്ധത മാലിദ്വീപ് പ്രസിഡന്റ് മുഹമ്മദ് മുയിസു ആവർത്തിച്ചു.
ദ്വീപില്‍ നിന്നും ഇന്ത്യൻ സൈന്യത്തെ പിൻവലിക്കുന്നത് സംബന്ധിച്ച് അദ്ദേഹം പ്രതികരിച്ചു. മാലദ്വീപിന്റെയും ഇന്ത്യയുടെയും മുൻഗണനകളെയും ആശങ്കകളെയും കുറിച്ച്‌ ഇരുരാജ്യങ്ങള്‍ക്കും ഇപ്പോള്‍ വളരെ നല്ല ധാരണയുണ്ട്. മാലദ്വീപിലുള്ള ജനങ്ങള്‍ ആവശ്യപ്പെടുന്ന കാര്യമാണ് ഞാൻ നടപ്പാക്കിയത്. ആഭ്യന്തര പ്രാധാന്യം അടിസ്ഥാനമാക്കിയുള്ള വിഷയങ്ങള്‍ക്ക് മുൻഗണന നല്‍കാനുള്ള ശ്രമങ്ങളുടെ ഭാഗമാണ് ഇതെന്നും അദ്ദേഹം പറഞ്ഞു.
