ബെയ്ജിങ്: അതിര്‍ത്തി കടന്നുള്ള ഭീകരവാദത്തെ നേരിടാന്‍ പ്രധാനമന്ത്രി നരേന്ദ്ര മോദി ചൈനയുടെ പിന്തുണ തേടിയതായി വിദേശകാര്യ സെക്രട്ടറി വിക്രം മിസ്രി. ഷാങ്ഹായ് സഹകരണ സംഘടനയുടെ (SCO) ഉച്ചകോടിക്കിടെ ചൈനീസ് പ്രസിഡന്റ് ഷി ജിൻപിങ്ങുമായി നടത്തിയ ഉഭയകക്ഷി ചർച്ചയിലാണ് മോദി ഈ ആവശ്യം മുന്നോട്ടുവെച്ചത്.
ഭീകരവാദം ഇന്ത്യയെയും ചൈനയെയും ഒരുപോലെ ബാധിക്കുന്ന വിഷയമാണെന്ന് മോദി ചൂണ്ടിക്കാട്ടി. ഈ വിഷയത്തിൽ ചൈന ഇന്ത്യക്ക് പിന്തുണ നൽകിയിട്ടുണ്ടെന്നും, ഭീകരവാദത്തെ ചെറുക്കുന്നതിൽ ഇരു രാജ്യങ്ങളും പരസ്പരം സഹകരിക്കേണ്ടത് അനിവാര്യമാണെന്നും അദ്ദേഹം പറഞ്ഞു.
കൂടാതെ, അതിർത്തി കടന്നുള്ള ഭീകരവാദത്തെ ചെറുക്കുന്നതിൽ ഇന്ത്യയും ചൈനയും തമ്മിൽ കൂടുതൽ ധാരണയും സഹകരണവും ആവശ്യമാണെന്ന് പ്രധാനമന്ത്രി ഊന്നിപ്പറഞ്ഞതായും വിക്രം മിസ്രി അറിയിച്ചു. ഈ പ്രസ്താവന ഷാങ്ഹായ് ഉച്ചകോടിയുടെ ഭാഗമായി നടന്ന വാർത്താ സമ്മേളനത്തിലായിരുന്നു.
