കൊച്ചി: വോട്ട് രേഖപ്പെടുത്തി ജോലിസ്ഥലത്തേക്ക് മടങ്ങുന്നതിനിടെ ഹൃദയാഘാതം അനുഭവപ്പെട്ട് 53കാരൻ മരിച്ചു. പാലാരിവട്ടം തമ്മനം കുത്താപ്പാടി അമ്പിളി ഹൗസിൽ താമസിക്കുന്ന പാലക്കാട് സ്വദേശി പി. സുരേഷ് കുമാർ ആണ് മരിച്ചത്.ഇന്നലെ രാവിലെ കുടുംബത്തോടൊപ്പമാണ് സുരേഷ് പാലാരിവട്ടം സെന്റ് റാഫേൽ സ്കൂളിലെത്തി തന്റെ സമ്മതിദാനാവകാശം വിനിയോഗിച്ചത്.
ജനാധിപത്യ കടമ നിർവഹിച്ച ശേഷം അദ്ദേഹം പതിവുപോലെ എറണാകുളം നോർത്തിലെ ജോലിസ്ഥലത്തേക്ക് തിരിച്ചു. എന്നാൽ യാത്രാമധ്യേ നെഞ്ചുവേദന അനുഭവപ്പെടുകയും അസ്വസ്ഥത കൂടുകയുമായിരുന്നു. ഉടൻ തന്നെ അടുത്തുള്ള സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
സുരേഷിന്റെ ഭാര്യ സിന്ധുവിന്റെ സ്വദേശമായ നാഗർകോവിലിൽ വെച്ചാണ് സംസ്കാര ചടങ്ങുകൾ നടക്കുന്നത്. മിനി എസ്. നായർ മകളാണ്.ജനാധിപത്യ പ്രക്രിയയിൽ പങ്കാളിയായതിന് തൊട്ടുപിന്നാലെ ഉണ്ടായ സുരേഷ് കുമാറിന്റെ മരണം നാടിന് നോവായി മാറി.
