തിരുവനന്തപുരം : മാസപ്പടി കേസിൽ വിജിലൻസ് അന്വേഷണം സ്റ്റേ ചെയ്തുകൊണ്ടുള്ള സുപ്രീം കോടതി വിധിയിൽ പ്രതികരണവുമായി സിപിഎം നേതാക്കളായ പി രാജീവും എംവി ഗോവിന്ദനും. നിയമപരമായ അവകാശമാണ് സുപ്രീം കോടതി ഇപ്പോൾ അംഗീകരിച്ചിരിക്കുന്നതെന്ന് പി രാജീവ് പറഞ്ഞു. അപ്പീൽ നൽകേണ്ടിയിരുന്നത് സർക്കാരായിരുന്നുവെന്നും അതിനുപകരം നാടകം പോലെ അതിവേഗത്തിൽ എഫ്ഐആർ ഇടുകയാണ് ചെയ്തതെന്നും അദ്ദേഹം വിമർശിച്ചു.
സുപ്രീം കോടതി സംസ്ഥാന സർക്കാരിനെ രൂക്ഷമായി വിമർശിച്ചുവെന്നും സുപ്രീം കോടതി വീണ്ടും അപ്പീൽ കേൾക്കാൻ ആവശ്യപ്പെട്ടതോടെ ഇഡിയുടെ എഫ്ഐആറിന് നിലനിൽപ്പില്ലാതായെന്നും പി രാജീവ് കൂട്ടിച്ചേർത്തു. അതേ സമയം നിയമവാഴ്ച ഉയർത്തിപ്പിടിക്കുന്ന വിധിയാണിതെന്ന് സിപിഎം സംസ്ഥാന സെക്രട്ടറി എംവി ഗോവിന്ദൻ മാസ്റ്ററും പ്രതികരിച്ചു.
പിണറായി വിജയനെതിരെ കേസ് കെട്ടിച്ചമയ്ക്കാനുള്ള ശ്രമമാണ് നടന്നതെന്നും ഇത് രാഷ്ട്രീയ പകപോക്കലാണെന്ന് തങ്ങൾ നേരത്തെ വ്യക്തമാക്കിയതാണെന്നും അദ്ദേഹം പറഞ്ഞു. പിണറായി വിജയന്റെ ഹർജി പരിഗണിക്കണമായിരുന്നു എന്നാണ് സുപ്രീം കോടതി വ്യക്തമാക്കിയതെന്നും ഹർജി വീണ്ടും പരിഗണിക്കണമെന്ന് ആവശ്യപ്പെട്ടിട്ടുണ്ടെന്നും എംവി ഗോവിന്ദൻ കൂട്ടിച്ചേർത്തു.
