ദില്ലി : ദില്ലി പൊലീസിന്റെ നടപടികൾക്കെതിരെ രൂക്ഷവിമർശനവുമായി ഓൾ ഇന്ത്യ സ്റ്റുഡൻസ് അസോസിയേഷൻ (ഐസ) ദേശീയ പ്രസിഡന്റ് നേഹ ബോറ. സാധാരണ പൗരന്മാരോട് പൊലീസ് ക്രിമിനലുകളെപ്പോലെയാണ് പെരുമാറുന്നതെന്ന് നേഹ ബോറ ആരോപിച്ചു.
തടവിലാക്കപ്പെടുന്നവരെ രാത്രി മുഴുവൻ കസ്റ്റഡിയിൽ വെച്ച ശേഷം അടുത്ത ദിവസം രാവിലെയോ വൈകുന്നേരമോ മാത്രമാണ് മോചിപ്പിക്കുന്നതെന്നും നേഹ ബോറ പറഞ്ഞു. പൊലീസ് കസ്റ്റഡിയിൽ നിന്ന് മോചിതയായ ശേഷം മാധ്യമങ്ങളോട് പ്രതികരിക്കുകയായിരുന്നു അവർ. നിയമവും സമാധാനവും എല്ലാ വഴികളിലൂടെയും ലംഘിക്കപ്പെടുകയാണ്.
സാധാരണ പൗരന്മാരെ പൈശാചിക കുറ്റവാളികളെപ്പോലെയാണ് പൊലീസ് കൈകാര്യം ചെയ്യുന്നത്. പകലായാലും വൈകുന്നേരമായാലും ആളുകളെ തടവിലാക്കി രാത്രി മുഴുവൻ കസ്റ്റഡിയിൽ വെച്ച ശേഷം പിറ്റേദിവസം രാവിലെയോ വൈകുന്നേരമോ മാത്രം മോചിപ്പിക്കുന്ന നടപടി ഏത് അധികാരത്തിന്റെയും നിയമത്തിന്റെയും അടിസ്ഥാനത്തിലാണെന്ന് നേഹ ബോറ ചോദിച്ചു.
വെള്ളിയാഴ്ച വൈകുന്നേരം കൊണാട്ട് പ്ലേസിൽ നടക്കാനിരുന്ന പ്രതിഷേധ പരിപാടിക്ക് മുന്നോടിയായാണ് മുൻകരുതൽ നടപടിയെന്ന നിലയിൽ നേഹ ബോറയെ പൊലീസ് കസ്റ്റഡിയിലെടുത്തത്.
