ദേശീയ പ്രോത്സാഹന ദിനത്തിൽ ഒരു നല്ല വാക്കാൽ നമുക്ക് പരസ്പരം താങ്ങും തണലുമാകാം…..
ജീവിതത്തിന്റെ തിരക്കുകളിൽപ്പെട്ട് നമ്മളിൽ പലരും പലപ്പോഴും മറന്നുപോകുന്ന ഒരു ചെറിയ കാര്യമുണ്ട്. ഒരു നല്ല വാക്കിന് എത്രത്തോളം കരുത്തുണ്ട് എന്ന സത്യം. മുറിവുകൾ ഉണക്കാനും, തളർന്നുവീണ ചിറകുകൾക്ക് വീണ്ടും ജീവൻ നൽകാനും, ഇരുണ്ട വഴികളിൽ ഒരു ചെറിയ വെളിച്ചം വീശാനും ഏതാനും നല്ല വാക്കുകൾക്ക് സാധിക്കും..
ദേശീയ പ്രോത്സാഹന ദിനത്തിന്റെ പശ്ചാത്തലത്തിൽ, പ്രോത്സാഹനത്തിന്റെ ആ മാന്ത്രിക ശക്തി വാക്കുകൾക്ക് ഒരു വലിയ പ്രത്യേകതയുണ്ട്. അവ ചിലപ്പോൾ മൂർച്ചയുള്ള ആയുധങ്ങളെപ്പോലെ മുറിവേൽപ്പിക്കാം, എന്നാൽ അതേ വാക്കുകൾക്ക് തോറ്റുപോകുന്നവന്റെ കൈപിടിച്ചുയർത്തുന്ന സ്നേഹസ്പർശമാകാനും കഴിയും. നാം നൽകുന്ന ഒരൊറ്റ നല്ല വാക്ക് അല്ലെങ്കിൽ അഭിനന്ദനം ചിലപ്പോൾ അത്രയധികം ബുദ്ധിമുട്ടുകളിലൂടെ കടന്നുപോകുന്ന ഒരാളുടെ ആ ദിവസത്തെത്തന്നെ മാറ്റിമറിച്ചേക്കാം….
പ്രോത്സാഹനം എന്നത് വെറുമൊരു ഔപചാരികതയല്ല..അത് മനുഷ്യർ തമ്മിലുള്ള ഹൃദയബന്ധത്തിന്റെ അടയാളമാണ്. പലപ്പോഴും നമ്മൾ ഒപ്പമുള്ളവരുടെ നിശബ്ദമായ കണ്ണീരോ അല്ലെങ്കിൽ അവരുടെ ഉള്ളിലെ ഭാരമോ കാണാതെ പോകാറുണ്ട്. “നീ ഒറ്റയ്ക്കല്ല, ഞാൻ ഒപ്പമുണ്ട്” എന്ന് ആരെങ്കിലും ഒരാൾ ആത്മാർത്ഥമായി പറഞ്ഞാൽ, ആ വാക്ക് നൽകുന്ന ആത്മവിശ്വാസം വളരെ വലുതാണ്…..
വലിയ വിജയങ്ങളെ മാത്രം അഭിനന്ദിക്കുന്നതിനേക്കാൾ മനോഹരമാണ് ചെറിയ ശ്രമങ്ങളെപ്പോലും തിരിച്ചറിഞ്ഞ് കൈയടിക്കുക എന്നത്. ഇന്ന് നമുക്ക് ചുറ്റുമുള്ളവരോട് കുറച്ചുനേരം മനസ്സ് തുറന്നു സംസാരിക്കാം. അവരുടെ നന്മകളെ അഭിനന്ദിക്കാം, ലക്ഷ്യങ്ങളിലേക്ക് നടന്നുനീങ്ങുന്നവർക്ക് ധൈര്യം പകർന്നുനൽകാം. ഒരു പുഞ്ചിരിയോടുകൂടിയ ചെറിയൊരു പ്രോത്സാഹനം പോലും മറ്റൊരാളുടെ ജീവിതത്തിലെ ഏറ്റവും വലിയ വഴിത്തിരിവായി മാറിയേക്കാം.
പരസ്പരം താങ്ങും തണലുമായി നമുക്ക് ഈ ലോകത്തെ കൂടുതൽ മനോഹരമാക്കാം…..മറ്റുള്ളവരെ ചേർത്തുപിടിക്കുന്ന ഈ ചെറിയ ശീലങ്ങൾ വ്യക്തികളിൽ മാത്രം ഒതുങ്ങുന്ന ഒന്നല്ല. നാം നൽകുന്ന ഒരു നല്ല വാക്ക് സ്വീകരിക്കുന്ന വ്യക്തി, പിന്നീട് മറ്റൊരാൾക്ക് ആശ്വാസമാകാൻ അത് പ്രചോദനമായി മാറും. അങ്ങനെ അതൊരു കരുതലിന്റെ വലിയ ശൃംഖലയായി പടരുന്നു.
പരസ്പരം കുറ്റപ്പെടുത്തുന്നതിനും തോൽപ്പിക്കാൻ നോക്കുന്നതിനും പകരം, ഓരോരുത്തരുടെയും ചെറിയ ശ്രമങ്ങളെപ്പോലും ചേർത്തുപിടിക്കുന്ന ഒരു സമൂഹം രൂപപ്പെടാൻ പ്രോത്സാഹനത്തിന്റെ ഈ സംസ്കാരം അനിവാര്യമാണ്.
അവിടെ അസൂയയും സ്വാർത്ഥതയും വഴിമാറി സ്നേഹവും അനുകമ്പയും നിറയുന്നു. ആരെങ്കിലും കൈപിടിച്ചുയർത്താനുണ്ടെന്ന ധൈര്യം സമൂഹത്തിലെ ഓരോ മനുഷ്യനെയും കൂടുതൽ ആത്മവിശ്വാസമുള്ളവരാക്കി മാറ്റും. അങ്ങനെ, നമ്മുടെ ചെറിയ വാക്കുകളും പുഞ്ചിരികളും ചേർന്ന് ഈ ലോകത്തെ കൂടുതൽ സ്നേഹനിർഭരവും കരുണയുള്ളതുമായ ഇടമാക്കി മാറ്റിയെടുക്കാം…..
സിന്ധു രാജീവ്
