പുതുപ്പള്ളി: വലിയ ഫ്ളക്സുകളോ, ചെവിടുപൊട്ടിക്കുന്ന ശബ്ദകോലാഹലങ്ങളോ, കൊട്ടും പാട്ടോ ഇല്ലാത്ത ഒരു തിരഞ്ഞെടുപ്പ് കാലം—അതായിരുന്നു പുതുപ്പള്ളി കണ്ട ചാണ്ടി ഉമ്മന്റെ പ്രചരണം. ലക്ഷങ്ങൾ വാരിയെറിഞ്ഞുള്ള ആർഭാടങ്ങളല്ല, ജനമനസ്സിലെ സ്ഥാനമാണ് വിജയത്തിന്റെ മാനദണ്ഡമെന്ന് വൻ ഭൂരിപക്ഷത്തോടെ വിജയിച്ച ഈ യുവ നേതാവ് തെളിയിച്ചിരിക്കുകയാണ്.
ചെലവായത് വെറും 21 ലക്ഷം ലാഭിച്ചത് 79 ലക്ഷം!തിരഞ്ഞെടുപ്പ് പ്രചരണത്തിനായി തനിക്ക് ചെലവായ തുക വെളിപ്പെടുത്തിക്കൊണ്ട് ചാണ്ടി ഉമ്മൻ ഇപ്പോൾ രാഷ്ട്രീയ കേരളത്തെ ഒന്നടങ്കം അത്ഭുതപ്പെടുത്തുകയാണ്.”തിരഞ്ഞെടുപ്പ് ആവശ്യങ്ങൾക്കായി എനിക്ക് ഏകദേശം 21 ലക്ഷം രൂപയോളമാണ് ചെലവായത്. കൃത്യമായ കണക്ക് രേഖകളിലുണ്ട്. അനുവദിക്കപ്പെട്ട തുകയിൽ ബാക്കി വന്ന 79 ലക്ഷം രൂപ ജനങ്ങൾക്കായി വിനിയോഗിക്കും,” അദ്ദേഹം പറഞ്ഞു.
തിരഞ്ഞെടുപ്പിന് മുൻപ് താൻ നൽകിയ വാഗ്ദാനം പാലിക്കാനൊരുങ്ങുകയാണ് അദ്ദേഹം. പ്രചരണ ചെലവിൽ നിന്നും ലാഭിക്കുന്ന തുക സ്വന്തമായി വീടില്ലാത്ത പാവപ്പെട്ടവരുടെ ഭവന നിർമ്മാണത്തിനായി ഉപയോഗിക്കുമെന്ന് അദ്ദേഹം നേരത്തെ വ്യക്തമാക്കിയിരുന്നു. ആ പ്രഖ്യാപനം ഇപ്പോൾ പ്രാവർത്തികമാക്കുകയാണ് പുതുപ്പള്ളിയുടെ പുതിയ എം.എൽ.എ.മറ്റ് സ്ഥാനാർത്ഥികൾ വാഹനവ്യൂഹങ്ങളുമായി പര്യടനം നടത്തിയപ്പോൾ, തനിച്ച് സൈക്കിൾ ചവിട്ടി വോട്ടർമാരെ നേരിൽ കണ്ട ചാണ്ടി ഉമ്മന്റെ ശൈലി ഏറെ ശ്രദ്ധിക്കപ്പെട്ടിരുന്നു.
സാധാരണക്കാരോടൊപ്പം ലളിതമായി ഇടപഴകിക്കൊണ്ടുള്ള ഈ യാത്രകൾ വോട്ടർമാരുടെ ഹൃദയം കീഴടക്കാൻ അദ്ദേഹത്തെ സഹായിച്ചു.രാഷ്ട്രീയത്തിലെ ധൂർത്തിനും ശബ്ദമലിനീകരണത്തിനുമെതിരെ ഒരു പുതിയ പാഠപുസ്തകമാവുകയാണ് ചാണ്ടി ഉമ്മന്റെ ഈ മാതൃകാപരമായ വിജയം.
