തിരുവനന്തപുരം: നിയമസഭാ തിരഞ്ഞെടുപ്പ് സ്ഥാനാർത്ഥി നിർണ്ണയത്തെച്ചൊല്ലി കോൺഗ്രസിനുള്ളിൽ ഭിന്നത രൂക്ഷമാകുന്നു. കെ.പി.സി.സി അധ്യക്ഷൻ കെ. സുധാകരൻ മത്സരരംഗത്തിറങ്ങുകയാണെങ്കിൽ തനിക്കും സീറ്റ് നൽകണമെന്ന കർശന നിലപാടുമായി അടൂർ പ്രകാശ് എം.പി ഹൈക്കമാൻഡിനെ സമീപിച്ചു. സുധാകരന് ലഭിക്കുന്ന അതേ പരിഗണന തനിക്കും വേണമെന്നാണ് അദ്ദേഹത്തിന്റെ വാദം.
തന്റെ നിലപാട് വ്യക്തമാക്കിക്കൊണ്ട് അടൂർ പ്രകാശ് കേന്ദ്ര നേതൃത്വത്തിന് നേരിട്ട് സന്ദേശം അയച്ചു. സുധാകരൻ മത്സരത്തിന് അർഹനാണെങ്കിൽ ആ അർഹത തനിക്കുമുണ്ടെന്ന് അദ്ദേഹം അവകാശപ്പെട്ടു.സ്ഥാനാർത്ഥിത്വവുമായി ബന്ധപ്പെട്ട് കോന്നി മണ്ഡലത്തിൽ എന്ത് പ്രത്യാഘാതമുണ്ടായാലും താൻ ഉത്തരവാദിയായിരിക്കില്ലെന്ന കടുത്ത മുന്നറിയിപ്പും അദ്ദേഹം നൽകിയിട്ടുണ്ട്. ഇത് നേതൃത്വത്തിന് വലിയ തലവേദനയായിരിക്കുകയാണ്.കോന്നിയിൽ താൻ സ്ഥാനാർത്ഥിയല്ലെന്ന തരത്തിൽ നേരത്തെ പങ്കുവെച്ചിരുന്ന പോസ്റ്റ് അടൂർ പ്രകാശ് പിൻവലിച്ചു.
ഇത് അദ്ദേഹം മത്സരരംഗത്തേക്ക് വരാനുള്ള നീക്കം സജീവമാക്കി എന്നതിന്റെ സൂചനയായാണ് വിലയിരുത്തപ്പെടുന്നത്.അടൂർ പ്രകാശ് കൂടി സീറ്റിനായി സമ്മർദ്ദം ചെലുത്തിയതോടെ, എം.പിമാരെ മത്സരരംഗത്തിറക്കുന്ന കാര്യത്തിൽ ഹൈക്കമാൻഡിന്റെ തീരുമാനം നിർണ്ണായകമാകും.”കോന്നി സീറ്റിലെ അവകാശവാദം അടൂർ പ്രകാശ് ശക്തമാക്കിയതോടെ, വരും മണിക്കൂറുകളിൽ കോൺഗ്രസ് സ്ഥാനാർത്ഥി പട്ടികയിൽ വലിയ മാറ്റങ്ങൾക്കും തർക്കങ്ങൾക്കും സാധ്യതയേറുന്നു.”
