തിരുവനന്തപുരം : ഓടിക്കൊണ്ടിരുന്ന കെഎസ്ആർടിസി ബസിന്റെ വാതിൽ തുറന്ന് റോഡിലേക്ക് വീണ് എം.ടെക് വിദ്യാർഥിനിക്ക് ഗുരുതര പരിക്ക്. തലക്കേറ്റ പരിക്കിനെ തുടർന്ന് വിദ്യാർഥിനിയെ വിദഗ്ധ ചികിത്സയ്ക്കായി ആശുപത്രിയിൽ പ്രവേശിപ്പിച്ചു.കൊല്ലം സ്വദേശിയും പാപ്പനംകോട് ശ്രീചിത്ര എഞ്ചിനീയറിങ് കോളേജിലെ എം.ടെക് വിദ്യാർഥിനിയുമായ മറിയ(22)ത്തിനാണ് പരിക്കേറ്റത്.
രാവിലെ ഒമ്പത് മണിയോടെ പാച്ചല്ലൂർ അഞ്ചാംകല്ല് ബസ് സ്റ്റോപ്പിലാണ് അപകടമുണ്ടായത്.പൂവാർ ഭാഗത്ത് നിന്നും നഗരത്തിലേക്ക് വന്ന ബസിൽ കയറിയ ഉടൻ തന്നെ ബസ് മുന്നോട്ടെടുത്തു. ബസ് ഏകദേശം 20 മീറ്റർ മുന്നോട്ട് നീങ്ങിയപ്പോൾ തിരക്കിനിടയിൽ മറിയക്ക് ബാലൻസ് നഷ്ടപ്പെടുകയും, വാതിൽ തുറന്ന് പുറത്തേക്ക് വീഴുകയുമായിരുന്നു. ബാഗിന്റെ വള്ളി വാതിലിന്റെ ലോക്കിൽ കുടുങ്ങിയതാണ് വാതിൽ തുറക്കാൻ ഇടയാക്കിയതെന്നാണ് പ്രാഥമിക നിഗമനം.
വീഴ്ചയിൽ തലക്ക് ഗുരുതരമായി പരിക്കേറ്റ മറിയയെ ഉടൻ തന്നെ അമ്പലത്തറയിലെ സ്വകാര്യ ആശുപത്രിയിൽ എത്തിച്ചു. പിന്നീട് വിദഗ്ധ ചികിത്സയ്ക്കായി ചാക്കയിലെ സ്വകാര്യ ആശുപത്രിയിലേക്ക് മാറ്റി. തലയ്ക്കുള്ളിൽ രക്തസ്രാവം കണ്ടെത്തിയതിനെ തുടർന്ന് ചികിത്സ തുടരുകയാണ്. കോളേജിലേക്ക് പോകുന്നതിനുള്ള സൗകര്യത്തിനായി പാച്ചല്ലൂരിലുള്ള ബന്ധുവീട്ടിലാണ് മറിയ താമസിച്ചിരുന്നത്.
