കൊച്ചി : ഭിന്നശേഷിക്കാരായ ഉദ്യോഗാർഥികൾക്കായി പരീക്ഷാ കേന്ദ്രങ്ങളിൽ റാംപും ലിഫ്റ്റും ഉൾപ്പെടെയുള്ള സൗകര്യങ്ങൾ ഉറപ്പാക്കണമെന്ന് ഹൈക്കോടതി പി.എസ്.സിക്ക് (കേരള പബ്ലിക് സർവീസ് കമ്മീഷൻ) നിർദേശം നൽകി. ലിഫ്റ്റ് സൗകര്യമില്ലാത്ത കെട്ടിടങ്ങളാണെങ്കിൽ ഭിന്നശേഷിക്കാർക്ക് താഴത്തെ നിലയിൽ പരീക്ഷാ സെന്റർ അനുവദിക്കണമെന്നും കോടതി വ്യക്തമാക്കി.
കൂടാതെ ഭിന്നശേഷിക്കാരായ ഉദ്യോഗാർഥികളുടെ താലൂക്കിലോ അല്ലെങ്കിൽ സമീപത്തുള്ള ഓൺലൈൻ പരീക്ഷാ കേന്ദ്രത്തിലോ പരീക്ഷാ സെന്റർ അനുവദിക്കണമെന്നും ഡിവിഷൻ ബെഞ്ച് നിർദേശം നൽകി. ലിഫ്റ്റ് സൗകര്യമില്ലാത്ത കെട്ടിടത്തിന്റെ രണ്ടാം നിലയിൽ പരീക്ഷാ കേന്ദ്രം അനുവദിച്ചതിനെ തുടർന്ന് ചലന വെല്ലുവിളി നേരിടുന്ന 290 ഉദ്യോഗാർഥികൾക്ക് 1000 രൂപ വീതം നഷ്ടപരിഹാരം നൽകണമെന്ന് ദേശീയ മനുഷ്യാവകാശ കമ്മിഷൻ 2019 ജനുവരി 30-ന് ഉത്തരവിട്ടിരുന്നു. ഈ ഉത്തരവ് റദ്ദാക്കിക്കൊണ്ടാണ് ഹൈക്കോടതി പി.എസ്.സിക്ക് കർശന നിർദേശം നൽകിയത്.
