കണ്ണൂർ: പയ്യന്നൂരിൽ വീട്ടുപറമ്പിൽ കയറി തേങ്ങയും അടയ്ക്കയും മോഷ്ടിച്ചയാൾക്കെതിരെ കേസെടുത്തു. കോറോം സ്വദേശിയായ തമ്പാനെതിരെയാണ് പയ്യന്നൂർ പോലീസ് കേസെടുത്തത്. ഏകദേശം അരലക്ഷം രൂപയുടെ നഷ്ടമുണ്ടായതായി വീട്ടുടമ പറഞ്ഞു. ബെംഗളൂരുവിൽ താമസിക്കുന്ന കോറോം സ്വദേശിയുടെ വീട്ടിലാണ് കവർച്ച നടന്നത്.
മോഷണത്തിന്റെ സി.സി.ടി.വി. ദൃശ്യങ്ങൾ പുറത്തുവന്നിട്ടുണ്ട്. കഴിഞ്ഞ നാല് മാസമായി ഇയാൾ പല തവണയായി തേങ്ങയും അടയ്ക്കയും മോഷ്ടിച്ച് ചാക്കുകളിലാക്കി കടത്തിക്കൊണ്ടുപോവുകയായിരുന്നു. നാല് മാസം മുൻപാണ് തമ്പാൻ ജയിലിൽ നിന്നിറങ്ങിയത്.ആഗസ്റ്റ് മാസം മുതലാണ് വീട്ടുപറമ്പിൽ കയറി പല തവണയായി തമ്പാൻ തേങ്ങ മോഷ്ടിച്ചത്.
തേങ്ങയും അടയ്ക്കയുമെല്ലാം ചാക്കുകളിലാക്കി കടന്നുകളയുകയായിരുന്നു. വീടിന്‍റെ പലയിടങ്ങളിലായി സ്ഥാപിച്ച സിസിടിവികളിൽ മോഷണ ദൃശ്യങ്ങളെല്ലാം പതിഞ്ഞു. ബെംഗളൂരുവിലിരുന്ന് വീട്ടുടമ എല്ലാം കണ്ടു. തുടർന്ന് തെളിവു സഹിതം മെയിലിൽ പരാതി അയച്ചു. തുടർന്ന് പ്രതിയെ പൊലീസ് തിരിച്ചറിഞ്ഞു. ഇയാളുടെ അറസ്റ്റ് രേഖപ്പെടുത്തിയിട്ടില്ല.
