കരുനാഗപ്പള്ളി: കരുനാഗപ്പള്ളി: കരുനാഗപ്പള്ളി റെയിൽവേ സ്റ്റേഷനിൽ ട്രെയിൻ തട്ടി യുവതിക്ക് ഗുരുതര പരിക്ക്. കോട്ടയം തിരുവാതുക്കൽ സ്വദേശിനി പ്രീതിലാൽ (45) ആണ് അപകടത്തിൽപ്പെട്ടത്. ഇന്ന് രാവിലെ ഏഴരയോടെയാണ് സംഭവം.
വഞ്ചിനാട് എക്സ്പ്രസ്സിൽ കരുനാഗപ്പള്ളി സ്റ്റേഷനിലിറങ്ങിയ പ്രീതിലാൽ പ്ലാറ്റ്‌ഫോമിൽ നിന്ന് റെയിൽവേ ട്രാക്ക് മുറിച്ച് കടക്കാൻ ശ്രമിക്കുന്നതിനിടെയാണ് അപകടം സംഭവിച്ചത്. അതേസമയം ലൂപ്പ് ട്രാക്കിലൂടെ വേഗത കുറച്ച് വന്ന മറ്റൊരു ട്രെയിൻ ഇവരുടെ ദേഹത്ത് തട്ടുകയായിരുന്നു.
ട്രെയിനിന്റെ തള്ളലിൽ ട്രാക്കിലേക്ക് വീണ യുവതിയുടെ സാരി ട്രാക്കിൽ കുടുങ്ങിയതോടെ കാൽ പുറത്തേക്ക് എടുക്കാൻ കഴിഞ്ഞില്ല. തുടർന്ന് ട്രെയിൻ കയറി കാൽ അറ്റുപോവുകയായിരുന്നു.
അറ്റുപോയ കാൽ സഹിതം പ്രീതിലാലിനെ ഉടൻ തന്നെ കരുനാഗപ്പള്ളി താലൂക്ക് ആശുപത്രിയിലെത്തിച്ചു. പിന്നീട് കൂടുതൽ വിദഗ്ദ്ധ ചികിത്സയ്ക്കായി കോട്ടയം മെഡിക്കൽ കോളേജിലേക്ക് മാറ്റി. പരിക്കുകൾ ഗുരുതരമായതിനാൽ അറ്റുപോയ കാൽ തുന്നിച്ചേർക്കാൻ സാധിക്കില്ലെന്ന് ഡോക്ടർമാർ അറിയിച്ചു.
