തിരുവനന്തപുരം:പുതിയ സർക്കുലർ പുറത്തിറക്കി, മോട്ടോർ വാഹന വകുപ്പ് ലൈസൻസ് ടെസ്റ്റിനുള്ള നിബന്ധനകളിൽ മാറ്റം വരുത്തി. ഇനി മുതൽ, ഓട്ടോമാറ്റിക് ഗിയർ കാറുകളും ഇലക്ട്രിക് വാഹനങ്ങളും ഡ്രൈവിങ് ടെസ്റ്റിനായി ഉപയോഗിക്കാം. ഹൈക്കോടതി ഉത്തരവിനെ തുടർന്നാണ് ഈ ഭേദഗതി.
കൂടാതെ, മോട്ടോർസൈക്കിൾ വിത്ത് ഗിയർ ലൈസൻസ് എടുക്കുന്നവർക്ക് ഹാൻഡിലിൽ ഗിയറുള്ള വാഹനം ഉപയോഗിക്കാൻ പാടില്ല എന്ന നിബന്ധനയും ഒഴിവാക്കി.
പുതിയ സർക്കുലറിൽ ഡ്രൈവിങ് സ്കൂളുകൾക്ക് ചില ഇളവുകളും നൽകിയിട്ടുണ്ട്. ഡ്രൈവിങ് ടെസ്റ്റിന് ഉപയോഗിക്കുന്ന വാഹനങ്ങൾക്ക് 15 വർഷത്തിൽ കൂടുതൽ പഴക്കം പാടില്ല എന്ന നിബന്ധനയും, ഡാഷ്‌ബോർഡ് ക്യാമറ സ്ഥാപിക്കണം എന്ന തീരുമാനവും പുതിയ സർക്കുലറിൽ നിന്ന് ഒഴിവാക്കിയിട്ടുണ്ട്.
