അപ്പനും മകനും നേർക്കുനേർ: മമ്മൂട്ടിയും ദുൽഖറും മികച്ച നടനുള്ള സൈമ അവാർഡിന്.

കൊച്ചി:മലയാള സിനിമയുടെ താരരാജാക്കന്മാരായ മമ്മൂട്ടിയും ദുൽഖർ സൽമാനും സൈമ അവാർഡിന് മികച്ച നടനുള്ള നോമിനേഷനിൽ മത്സരിക്കുമ്പോൾ ആരാധകർ ആവേശത്തിലാണ്. കാലങ്ങളായുള്ള അഭിനയ ജീവിതത്തിൽ വ്യത്യസ്തമായ വേഷങ്ങൾ ചെയ്താണ് മമ്മൂട്ടി അമ്പരിപ്പിക്കുന്നതെങ്കിൽ,

പ്രതിസന്ധികൾ തരണം ചെയ്ത് പാൻ ഇന്ത്യൻ സ്റ്റാറായി തിളങ്ങിയാണ് ദുൽഖർ ഞെട്ടിക്കുന്നത്. ഇരുവരുടേയും നിരവധി സിനിമകൾ അണിയറയിൽ ഒരുങ്ങുകയാണ്. ഈ അവസരത്തിൽ മികച്ച നടൻ ആരെന്ന മത്സരത്തിന് തയ്യാറെടുത്തിരിക്കുകയാണ് മമ്മൂട്ടിയും ദുൽഖറും. മമ്മൂട്ടി മലയാളത്തിലാണെങ്കിൽ ദുൽഖർ തെലുങ്കിൽ മികച്ച നടനാകാനുള്ള മത്സരത്തിലാണ്.

ഭ്രമയു​ഗം എന്ന ബ്ലാക് ആൻഡ് വൈറ്റ് ചിത്രത്തിലെ പ്രകടനത്തിനാണ് മമ്മൂട്ടിയ്ക്ക് നോമിനേഷൻ. ഒപ്പം ആസിഫ് അലി(കിഷ്കിന്ധാ കാണ്ഡം), ഫഹദ് ഫാസിൽ(ആവേശം), പൃഥ്വിരാജ്(ആടുജീവിതം), ടൊവിനോ തോമസ്(എആർഎം), ഉണ്ണി മുകുന്ദൻ(മാർക്കോ) എന്നിവരും മത്സരരം​ഗത്തുണ്ട്.

തെലുങ്കിൽ വമ്പൻ താരങ്ങൾക്കൊപ്പമാണ് ദുൽഖർ മാറ്റുരയ്ക്കുക. ലക്കി ഭാസ്കർ എന്ന ചിത്രത്തിലെ പ്രകടനത്തിനാണ് ദുൽഖറിന് നോമിനേഷൻ. അല്ലു അർജുൻ(പുഷ്പ 2), ജൂനിയൻ എൻടിആർ(ദേവര), നാനി(സരിപേത സനിവാനം), പ്രഭാസ്(കൽക്കി 2898 AD), തേജ സജ്ജ(ഹനുമാൻ) എന്നിവരാണ് ദുൽഖറിനൊപ്പം മികച്ച തെലുങ്ക് നടൻ കാറ്റ​ഗറിയിൽ മത്സരിക്കുന്നത്.