വയനാട്:താമരശ്ശേരി ചുരം വഴി യാത്രചെയ്യുന്നവർക്ക് മുന്നറിയിപ്പ്. ചുരം വഴിയുള്ള ഗതാഗതം പൂര്ണമായും നിരോധിച്ചു. ഇനിയൊരു അറിയിപ്പുണ്ടാകുന്നതു വരെ ഗതാഗതം പൂര്ണമായും നിരോധിച്ചതായാണ് ജില്ലാ കലക്ടര് സ്നേഹില് കുമാര് സിംഗ് അറിയിച്ചത്. ശക്തമായ മഴയില് പാറക്കഷ്ണങ്ങളും മണ്ണും റോഡിലേക്ക് വീഴുന്ന സാഹചര്യത്തിലാണ് ഗാതാഗത നിരോധനം.
ആംബുലന്സ് ഉള്പ്പെടെയുള്ള എമര്ജന്സി വാഹനങ്ങള് പൊലീസിന്റെ അനുമതിയോടെ കടത്തിവിടും. നിയന്ത്രണങ്ങളുമായി ജനങ്ങള് സഹകരിക്കണമെന്നും കളക്ടര് അറിയിച്ചിട്ടുണ്ട്. റോഡില് നിന്ന് മണ്ണ് നീക്കം ചെയ്യാനുള്ള പ്രവൃത്തികള് പുരോഗമിക്കുന്നുണ്ട്.
താമരശ്ശേരി തഹസില്ദാര് സി സുബൈര് ഉള്പ്പെടെയുള്ള റവന്യൂ ഉദ്യോഗസ്ഥരുടെ നേതൃത്വത്തില് പൊലീസ്, ഫയര് ആന്റ് റെസ്ക്യൂ ഉള്പ്പെടെയുള്ള ഏജന്സികളാണ് ഇതുമായി ബന്ധപ്പെട്ട പ്രവര്ത്തനങ്ങള് നടത്തുന്നത്.
കോഴിക്കോട് ജില്ലാ ദുരന്ത നിവാരണ വിഭാഗം ഡെപ്യൂട്ടി കലക്ടര് എം രേഖ, ഹസാഡ് അനലിസ്റ്റ് പി അശ്വതി, ജില്ലാ സോയില് കണ്സര്വേഷന് ഓഫീസര് എം രാജീവ്, അസിസ്റ്റന്റ് ജിയോളജിസ്റ്റ് ദീപ ഉള്പ്പെടെയുള്ള സംഘം ഇന്നലെ സംഭവ സ്ഥലം സന്ദര്ശിക്കുകയും ആവശ്യമായ നടപടികള് നിര്ദ്ദേശിക്കുകയും ചെയ്തിട്ടുണ്ട്.
