കോഴിക്കോട്: സംസ്ഥാനത്ത് അമീബിക് മസ്തിഷ്ക ജ്വരം വീണ്ടും ആശങ്ക പടർത്തുന്നു. പാലക്കാട് പട്ടാമ്പി സ്വദേശിയായ 27-കാരന് കൂടി രോഗം സ്ഥിരീകരിച്ചു. കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലുള്ള ഇദ്ദേഹത്തെക്കൂടി കണക്കിലെടുക്കുമ്പോൾ, ജില്ലയിൽ ഈ രോഗം ബാധിച്ച് ചികിത്സയിലുള്ളവരുടെ എണ്ണം 11 ആയി.
ഈ വർഷം മാത്രം കേരളത്തിൽ അമീബിക് മസ്തിഷ്ക ജ്വരം ബാധിച്ച് 17 പേർ മരിച്ചു.രണ്ട് മാസം മുമ്പ് ഒരു നീന്തൽക്കുളത്തിൽ കുളിച്ചതിനെത്തുടർന്നാണ് രോഗലക്ഷണങ്ങൾ കണ്ടുതുടങ്ങിയതെന്നാണ് കരുതുന്നത്. ആദ്യം പാലക്കാട്ടെ സ്വകാര്യ ആശുപത്രിയിലും പിന്നീട് വിദഗ്ദ്ധ ചികിത്സയ്ക്കായി കോഴിക്കോട് മെഡിക്കൽ കോളേജിലും പ്രവേശിപ്പിച്ചു.ഈ രോഗത്തിന്റെ ആഗോള മരണനിരക്ക് 97% ആണെങ്കിൽ, കേരളത്തിൽ അത് 24% മാത്രമാണ്. കഴിഞ്ഞ ദിവസം തിരുവനന്തപുരത്ത് 52 വയസ്സുകാരിയും കൊല്ലത്ത് 91 വയസ്സുകാരനും ഈ രോഗം ബാധിച്ച് മരിച്ചിരുന്നു.
നീന്തൽക്കുളങ്ങളിലെയും കെട്ടിക്കിടക്കുന്ന വെള്ളത്തിലെയും അമീബ മൂക്കിലൂടെ ശരീരത്തിൽ പ്രവേശിക്കുന്നതാണ് രോഗകാരണമെന്നായിരുന്നു ആദ്യ നിഗമനം. എന്നാൽ, കുളങ്ങളിൽ ഇറങ്ങാത്ത മൂന്ന് മാസം പ്രായമുള്ള കുട്ടിക്ക് പോലും രോഗം ബാധിച്ചത് ഈ നിഗമനത്തെ തെറ്റാണെന്ന് തെളിയിക്കുന്നു.രോഗബാധിതരുടെ എണ്ണം വർദ്ധിക്കുമ്പോഴും മരണനിരക്ക് താരതമ്യേന കുറഞ്ഞ നിലയിൽ തുടരുന്നത് മാത്രമാണ് ഇപ്പോൾ ഏക ആശ്വാസം. രോഗം എങ്ങനെ തടയാം എന്നതിനെക്കുറിച്ച് ഇപ്പോഴും വ്യക്തമായ ഉത്തരങ്ങളില്ല. കൂടുതൽ ഗവേഷണങ്ങളും പഠനങ്ങളും ആവശ്യമാണ്.
