2024-ലെ ലോക്സഭാ തിരഞ്ഞെടുപ്പിൽ കർണാടകയിൽ വൻതോതിൽ വോട്ടുതട്ടിപ്പ് നടന്നെന്നാരോപിച്ച് സംസ്ഥാന നിയമവകുപ്പ് അന്വേഷണം ആരംഭിച്ചു. ബെംഗളൂരുവിൽ വെള്ളിയാഴ്ച നടന്ന “വോട്ടവകാശ പോരാട്ട” റാലിയിൽ ലോക്സഭാ പ്രതിപക്ഷ നേതാവ് രാഹുൽ ഗാന്ധി,
ബെംഗളൂരു സെൻട്രൽ ലോക്സഭാ മണ്ഡലത്തിലെ മഹാദേവപുര നിയമസഭാ മണ്ഡലത്തിൽ ഒരുലക്ഷത്തിലധികം കള്ളവോട്ടുകൾ ചേർത്തതായാണ് തെളിവുകളോടെ ആരോപിച്ചത്. സംസ്ഥാന സർക്കാർ അന്വേഷണം നടത്തണമെന്ന് അദ്ദേഹം മുഖ്യമന്ത്രി സിദ്ധരാമയ്യയോട് ആവശ്യപ്പെട്ടു.
ഉപമുഖ്യമന്ത്രി ഡി.കെ. ശിവകുമാർ വെള്ളിയാഴ്ച വൈകിട്ട് കർണാടക മുഖ്യ തിരഞ്ഞെടുപ്പ് ഓഫീസർക്ക് പരാതി നൽകി. എന്നാൽ അന്വേഷണം നടത്താൻ തെളിവുകളും സത്യവാങ്മൂലവും ആവശ്യമാണ് എന്ന് തിരഞ്ഞെടുപ്പ് ഓഫീസ് അറിയിച്ചു.
കേരളത്തിലും സമാന ആരോപണങ്ങളാണ് ഉയർന്നിരിക്കുന്നത്.
തൃശൂർ മണ്ഡലത്തിൽ ഡിസിസി പ്രസിഡന്റ് ജോസഫ് ടാജറ്റ് ആരോപിച്ചത്, സുരേഷ് ഗോപി താമസിച്ചിരുന്ന നെട്ടിശ്ശേരിയിലെ വീട്ടിൽ 11 കള്ളവോട്ടുകൾ ചേർത്തുവെന്നാണ്. ഇപ്പോൾ ആ വീട്ടിൽ വോട്ടർ പട്ടികയിലെ ആരും താമസിക്കുന്നില്ല.
വാർഡ് 30-ൽ അവസാന ഘട്ടത്തിലാണ് വോട്ടുകൾ ചേർത്തതെന്നും 45 പേരുടെ വോട്ടുകളിൽ തിരഞ്ഞെടുപ്പ് സമയത്ത് പരാതി നൽകിയിരുന്നുവെന്നും അദ്ദേഹം പറഞ്ഞു.സ്വതന്ത്ര അന്വേഷണം ആവശ്യപ്പെട്ട് അന്നത്തെ കളക്ടർ വി.ആർ. കൃഷ്ണതേജയ്ക്ക് പരാതി നൽകിയിരുന്നുവെങ്കിലും,
പട്ടികയിൽ പേര് ഉണ്ടെങ്കിൽ വോട്ട് ചെയ്യാമെന്ന നിലപാട് കളക്ടർ സ്വീകരിച്ചുവെന്ന് ടാജറ്റ് ആരോപിച്ചു. ബിജെപി ചേർത്ത 65,000 വോട്ടുകളിൽ ഭൂരിഭാഗവും സ്ഥിരതാമസക്കാരുടേതല്ലെന്നും, പുതുതായി ചേർത്തവരിൽ ഭൂരിഭാഗവും 45–70 വയസ്സ് പ്രായമുള്ളവരാണെന്നും അദ്ദേഹം കൂട്ടിച്ചേർത്തു.
എൽഡിഎഫ് സ്ഥാനാർത്ഥിയായിരുന്ന വി.എസ്. സുനിൽകുമാർ മുഖ്യ തിരഞ്ഞെടുപ്പ് ഓഫീസർ പറഞ്ഞ “പരാതി ലഭിച്ചിട്ടില്ല” എന്ന വിശദീകരണം തെറ്റാണെന്ന് പ്രതികരിച്ചു. ചീഫ് ഇലക്ഷൻ ഏജന്റ് കെ.പി. രാജേന്ദ്രൻ നാലുതവണ ജില്ലാവരണാധികാരിക്ക് പരാതി നൽകിയിരുന്നുവെന്നും, കളക്ടർ കൃഷ്ണതേജ പരാതി ഉയർന്ന തലത്തിലേക്ക് കൈമാറിയില്ലെന്നുമാണ് ആരോപണം.
തിരഞ്ഞെടുപ്പിനു ശേഷം കൃഷ്ണതേജ എൻഡിഎ ഭരിക്കുന്ന സംസ്ഥാനത്തെ ഉപമുഖ്യമന്ത്രിയുടെ സംഘത്തിലേക്ക് ചേർന്നുവെന്നും അദ്ദേഹം സംശയിച്ചു.വോട്ടർ പട്ടികയിലെ ക്രമക്കേടുകൾ സംബന്ധിച്ച തെളിവുകൾ സമർപ്പിക്കപ്പെടുന്ന സാഹചര്യത്തിൽ അന്വേഷണം എത്രത്തോളം മുന്നോട്ട് പോകുമെന്ന് കാത്തിരിക്കുകയാണ് രാഷ്ട്രീയ നിരീക്ഷകർ.
