ധാക്ക : ബംഗ്ലാദേശ് മുൻ പ്രധാനമന്ത്രി ഷെയ്ഖ് ഹസീനയ്ക്ക് രാജ്യത്തെ കുറ്റകൃത്യ ട്രിബ്യുണൽ വധശിക്ഷ വിധിച്ചു. മനുഷ്യരാശിക്കെതിരായ കുറ്റകൃത്യം ചെയ്തെന്ന കോടതിയുടെ കണ്ടെത്തലിന്റെ അടിസ്ഥാനത്തിലാണ് ഈ സുപ്രധാന വിധി. കഴിഞ്ഞ വർഷം (2024-ൽ) നടന്ന വിദ്യാർത്ഥി പ്രക്ഷോഭങ്ങളെ അക്രമാസക്തമായി അടിച്ചമർത്താൻ ഹസീനയുടെ സർക്കാർ ഉത്തരവിട്ടതുമായി ബന്ധപ്പെട്ട കേസിലാണ് വിധി.
ഈ അടിച്ചമർത്തലുകളുടെ സൂത്രധാരയും പ്രധാന ശിൽപ്പിയും ഹസീനയാണെന്നാണ് കോടതി കണ്ടെത്തിയത്. പ്രക്ഷോഭങ്ങളെ തുടർന്ന് അധികാരത്തിൽ നിന്ന് പുറത്താക്കപ്പെട്ട ശേഷം രാജ്യം വിട്ട ഷെയ്ഖ് ഹസീന നിലവിൽ ഇന്ത്യയിൽ പ്രവാസ ജീവിതം നയിക്കുകയാണ്. ട്രിബ്യൂണലിന്റെ ഉത്തരവുകൾ ധിക്കരിച്ചതിനെ തുടർന്ന് അവർ ഹാജരാകാതെയാണ് വിചാരണ പൂർത്തിയാക്കിയത്.
