തൃപ്പൂണിത്തുറ:പൊന്നോണത്തെ വരവറിയിച്ച് അത്തം പിറന്നു.ഇനിയുള്ള പത്തു നാളുകള് വീട്ടുമുറ്റങ്ങളില് പൂക്കളങ്ങള് വിരിയും. ലോകമെങ്ങുമുളള മലയാളികള്ക്ക് ഇനി ആഘോഷത്തിന്റേയും ഉത്സവത്തിന്റേയും ദിനരാത്രങ്ങള്. സമഭാവനയുടെ സന്ദേശമോതുന്ന തിരുവോണത്തിനായി മാവേലിയെ വരവേല്ക്കാന് നാടൊരുങ്ങുകയാണ് നാട്ടാരും.
പരിശുദ്ധിയുടെ തൂവെള്ള നിറമേഴും തുമ്പ മുതല് ചെത്തി, മന്ദാരം, ചെണ്ടുമല്ലി, പിച്ചകപൂവെല്ലാം കാഴ്ച്ചയൊരുക്കുന്ന പൂക്കളമായി മാറും. അയല്പക്ക സംസ്ഥാനങ്ങളിലെ വസന്തവും മുറ്റങ്ങളെ അലങ്കരിക്കും. ഓണത്തിന്റെ വരവറിയിച്ച് തൃപ്പൂണിത്തുറയില് ഇന്ന് അത്തം ഘോഷയാത്ര.
സംസ്ഥാനത്ത് ഔദ്യോഗികമായി അത്തച്ചമയ ഘോഷയാത്രയോടെ ഓണാഘോഷങ്ങൾക്ക് തുടക്കമാകും.മന്ത്രി എംബി രാജേഷ് ചടങ്ങ് ഉദ്ഘാടനം ചെയ്യും. പി രാജീവ് അത്തപ്പതാക ഉയർത്തും. നടന് ജയറാമാണ് ഘോഷയാത്ര ഫ്ളാഗ് ഓഫ് ചെയ്യുന്നത്. സിനിമാ താരം പിഷാരടിയും ആഘോഷങ്ങളിൽ പങ്കെടുക്കും.
