മലപ്പുറം:കാല്‍മുട്ടില്‍ കെട്ടിവച്ച് ബംഗളൂരുവില്‍ നിന്ന് മാരക മയക്കുമരുന്ന് കടത്തിയ യുവതിയും യുവാവും പിടിയിൽ. കോഴിക്കോട് സ്വദേശികളായ സുബീന, ഷഫീഖ് എന്നിവരാണ് എടക്കരയില്‍ പിടിയിലായയത്. എംഡിഎംഎയും ഹാഷിഷ് ഓയിലും ഇരുവരില്‍ നിന്നുമായി പിടിച്ചെടുത്തു. കാറില്‍ ബാംഗ്ലൂരില്‍ നിന്ന് വരവേയാണ് ഇരുവരും പിടിയിലായത്.
ബംഗളൂരുവില്‍ നിന്ന് കാറില്‍ മയക്കുമരുന്ന് കടത്തുന്നേുണ്ടെന്ന രഹസ്യ വിവരത്തെ തുടര്‍ന്നാണ് ഡാന്‍സാഫ് സംഘം എടക്കര ടൗണില്‍ പരിശോധന നടത്തിയത്. ബംഗളൂരുവില്‍ ന്ിന്ന് കേരളത്തിലേക്ക് വരുകയായിരുന്ന സുഹൃത്തുക്കളായ യുവാവിനെയും യുവതിയെയും മാരക മയക്കുമരുന്ന് ശേഖരവുമായി ഡാന്‍സാഫ് സംഘം പിടികൂടി. കോഴിക്കോട് പുതിയങ്ങാടി സ്വദേശി കുഞ്ഞിരായിന്‍കണ്ടി വീട്ടില്‍ ഷഫീഖ്, കോഴിക്കാട് നടക്കാവ് സ്വദേശി നാലുകുടി പറമ്പ് വീട്ടില്‍ സുബീന എന്നിവരെയാണ് ഡാന്‍സാഫ് സംഘം വാഹനപരിശോധനയ്ക്കിടെ പിടികൂടിയത്.
ഇരുവരില്‍ നിന്നുമായി 39.60 ഗ്രാം എംഡിഎംഎയും 76.40 ഗ്രാം ഹാഷിഷ് ഓയിലും പിടിച്ചെടുത്തു.വെള്ളിയാഴ്ച രാത്രി 9 മണിയോടെയാണ് ബംഗളൂരുവില്‍ നിന്ന് ഷഫീഖും സുബീനയും കാറില്‍ എടക്കരയിലെത്തിയത്. ടൗണില്‍ വാഹന പരിശോധന നടത്തുന്നതിനിടെ ഡാന്‍സാഫ് സംഘം കാര്‍ തടഞ്ഞുനിര്‍ത്തി പരിശോധന നടത്തി. ആദ്യം കാറില്‍ പരിശോധന നടത്തിയെങ്കിലും ഒന്നും കണ്ടെത്താനായില്ല.
തുടര്‍ന്ന് ശരീരത്തില്‍ ഒളിപ്പിച്ചിരിക്കാമെന്ന നിഗമനത്തില്‍ ഇരുവരെയും കസ്റ്റഡിയിലെടുത്ത് എടക്കര ഏറനാട് ആശുപത്രിയിലെത്തിച്ച് നടത്തിയ പരിശോധനയിലാണ് മയക്കുമരുന്ന് കണ്ടെടുത്തത്. സുബീനയുടെ വലതു കാല്‍മുട്ടിന് താഴെ കെട്ടിവെച്ച നിലയിലായിരുന്നു മയക്കുമരുന്ന്.
